ملحمة القطاطيش مجموعة قصصية عن صراع مجتمعات القطط، يكتبها أ. جورج فريد.

حوار بين قطة ب و إنسان ج (1)

ب _ تعالى نلعب شوية

ج _ روحي العبي مع صحابك القطط

ب _ لأ.. عايزة العب معاك إنت

ج _ مش فاضي دلوقتي

ب _ حجة كدابة وسخيفة.. ماوراكش أي حاجة

ج _ بصراحة إنتي بتزوديها أوى ف اللعب و بتخربشي وتعضي زي ما تكوني فاكراني قط

ب _ و دا يبقى لعب أيه الماسخ ده اللي مفيهش خربشة وعض؟ لكن عشان خاطرك هخلي بالي وأعض واخربش بالراحة

ج _ و بعدين مش ملاحظة إن مشمش إبتدا يغير مني؟

ب _ طاب ما يغير.. دى حاجة مفروض تبسطك

ج _ أنا شايف إنك تصالحيه وتبطلي تلعبي معايا

ب _هصالحه وقت ماحب و دلوقتى عايزة العب معاك

ج _تكوني مش واخدة بالك إن فيه فروق بين القطط و البنيأدمين؟

ب _فروق مش جوهرية وماتمنعش إنهم يلعبوا مع بعض ويحبوا بعض

حوار بين قطة ب و إنسان ج (2)

ج _ في فروق واضحة و مهمة يظهر إنك مش واخدة بالك منها

ب _ بتغني و ترد علي نفسك؟ مين اللي قال لك إنى مش واخدة بالي؟  لأ واخداه و عارفه قصدك ايه

ج _طاب قولي كده

ب _ فروق الشكل والوزن والحجم

ج _ والقدرات؟

ب _ (ب إبتسامة ساخرة) قدرات مين يابو قدرات؟

ج _ ما تاخديش كلامي علي محمل الإهانة.. بس لاحظي إن الإنسان هو أعقل الكائنات والمسيطر عليها والوحيد بينها اللي قدر يتحكم في الطبيعة

ب _ (لنفسها و هى تهم ب الإبتعاد) دخلنا في التخريف

حوار بين قطة ب و إنسان ج (3)

ج _ طاب تعالي نعمل صفقة.. أسألك كام سؤال و نلعب شوية ب عض خفيف زي ماتفقنا

ب _ و لو اني مابحبش الصفقات إنما ماشي

ج _ هو الكون ده وراه عقل منظم ولا اتوجد بالصدفة؟

ب _ هو انتو معندكوش غير السؤال التافه ده؟ و علي أي حال إختلفت القطط في ذلك

ج _لأ بقى! مش معقول حتى الحيوانات اللي عايشة علي الفطرة مش عارفة.. أروح لمين يا ربي

ب _ من وقت ما استقططناكم وسبناكم تقولو إنكم استأنستونا فقدنا الفطرة وبقينا ساعات نتفلسف زييكو و ده بيوصل للتوهان

ج _ يعني طلعتي تايهة زيي

ب _ تايهة ومغشوشة زييك بس حرة

ج _ لأ ماسمحلكيش أنا برضو حر وانتي محتاجاني أكتر مانا محتاجك

ب _ ( لنفسها) يا ميلة بختك يا بسبسة.. اللى حبتيه طلع ندل كمان و بيعايرك بشوية الأكل اللي بيحطهملك وبرضو هتفضلي تحبيه عشان القطة لما تقرر تحب ما بترجعش ف قرارها

ج _ مش برضو علبة التونة اللي فتحتهالك اول مرة هي سبب الحب؟

ب _ الحب مالوش سبب وانا مش محتاجة تونتك ولما أجوع أقدر أطلع الشجرة دى فى ثواني أجيب عصفور أطعم من أكلك.. باكل سحالي و فيران و جراد و لو صومت أسبوع مايأثرش فيا يابو قدرات.. قليت مزاجي و مش عايزة ألعب معاك.. بس هأرجعلك لما الغزالة تروق عشان بحبك يا ندل

حوار بين قطة ب و انسان ج (4)

بعد غياب يومين رجعت القطة وأول ماشافها

ج _ حمدلله عالسلامة

ب _ الله يسلمك

ج _  شغلتيني عليكي..و مقولتيش ليه إنك هتغيبي

ب _ مكنتش عارفة 

ج _ كنتي فين و بتعملي أيه

ب _ دي مسائل قططية مش هتفهمها

ج _ آه فهمت.. حب جديد

ب _ بنغير ولا أيه

ج _ مفيش غيرة ولا حاجة.. دا انا اللي كل شوية أقول لك فكك مني والعبي مع القطط

ب _ يعني مبتحبنيش؟

ج _ مش الحب اللي بالك منه

ب _ طاب يللا فطرني و دلعني شوية

 بعد ماشربت اللبن بيحط أيده علي راسها ويبتدي يمسح عليها وهي تلزق راسها في أيده وتبصله بصه بعينها الوحيدة

ج _ أيه يا بت العيون الجميلة الدوبلي دول

ب _ (لنفسها) ماحبتوش من شوية..ثم (بدلال) و أيه كمان؟

ج _ و الشنبات المحترمة اللي يقف عليها صقرين

ب _ دمك تقيل و هزارك ماسخ

تتمسح فيه أكثر طالبة مزيد من الطبطبة

ج _ ده اللي بخاف منه

ب _ متبقاش جبان..عض بمنتهى الحنية.. حتي بص

تفتح بقها بالراحة وتعضعض في صوابعه برقة غير معتادة فيتشجع و يبتدي يمسجها وتهبشه هبشة خفيفة تعمل له جرح سطحي

ج _ أنا كنت عارف.. شوفتي عورتيني إزاي

ب _ يقطعني مكانش قصدي

ج _ خلاص مادام مكانش قصدك نلعب شوية صغيرين بس خلي بالك

ب _ هخلي بالي عالآخر

و في لمح البصر تهبشه هبشة أجمد من الأولى تسيح دمه فيصرخ وتتخض وتقوم

ب – رجالة أيه ياختي الورق دول

حوار بين قطة ب و إنسان ج (5) / مشمش

 مشمش هو فيلسوف العصابة .. وهو متجوز عسلية علي الشريعة الباستتية (البسبسية بالدارجة).مشمش امكانياته أكبر من طموحاته.. بل ممكن نقول إن طموحه الوحيد إنه يعيش كقط بوهيمي إن جاز إعتبار ده طموح والنقد الوحيد الممكن توجيهه لكده: ليه ارتبط بعسلية رسميا وكيف فشل في التملص من هذا الارتباط؟

لمتابعة تفاصيل القصة من البداية اضغط على الرابط التالي: ملحمة القطاطيش 1- ترتيب الملوك … بقلم: جورج فريد

 لما رجع حنكورة مكسور من الملحمة اللي فقد فيها عينه وفضل مخبي ديله بين رجليه لمدة شهر توقعت إن مشمش يزيحه من عرش الفتونة و يبقي ألفا العصابة لكن مشمش فضل مخلص لطبعه وفلسفته المسالمة في تجنب أي مشكلة أو احتكاك بأي كائن. و رجع حنكورة أشرس من الأول وبقي يبرشط ويبلطج علي كل المجموعة ويستولى علي الأكل من قدامهم ولما حبيت أعاتب مشمش ليه سمح بكده و كان يقدر يمنعه سواء بالتفوق علي حنكورة بدنياً وصحياً أو بشعبيته وسط البنات اللي زهقانين من برشطة حنكورة دار بيننا الحوار التالي:

ج- خيبت أملي يا مشمش

م- مالي أنا ومال أملك.. منطق أيه ده اللي يخلي حد يحط أمله في غيره؟

ج- أنا مش منتظر منك حاجة بصفة شخصية طبعاً.. لكن لمجموعة القطط اللي بيحبوك و اللي مقدرتش تخلصهم من بلطجة حنكورة وهو في أضعف حالاته. بس كمان أحب أفكرك إنك برضو حاطط أملك فيا ومستنيني أجيبلك أكل كل ماتجوع.

م- مفيش قط أو قطة بيستني من قط غيره يحل له مشاكله مع طرف تالت وكل فرد مسؤل عن نفسه بس. وبعدين مادام انت بقيت كبيرنا فطبيعي نستني منك أكل لما نجوع.. وأخيراً العين ماتعلاش علي الحاجب.. إزاي أضرب حنكورة وانتا موجود؟ .. دي حتي تبقي عيبة ف حقك.

ج- كنت فاهمك أذكي وأصرح من كده يا مشمش.. ولا انت بتجرب تصيع عليا يالا؟ كبيركم إزاي يعني؟ إنت بالذات يا فيلسوف الهرر واخد بالك كويس من الفروق بينكم و بيننا و عمرك ماوثقت فيا ولا اتعاملت معايا علي إننا من نفس النوع.

م- انت مش واضح ليه و تمللي تدخل كذا موضوع ف بعض؟ ليه مش بتناقش نقطة نقطة؟

ج- ماهو ده الفرق اللي عملنا بنيأدمين وسابكم حيوانات يابو المشاميش.. يعني قدرتنا علي التفكير المركب المعقد والنظري في مواضيع غير الأكل والشرب والجنس والصراع المادي.

م- مادام كده بقي لو سمحت ماترفعش الكلفة معايا وتقوللي يالا ويابو المشاميش.

ج- حضرتك عايز تعامل رسمي يا حضرة القط المحترم.. وياتري الأكل اللي بجيبهلكم ده ودي ولا رسمي؟

م- أيه اللي دخل الأكل في التعامل ودردشة الكلام؟

و مش مفروض إن الإنسان الذكي القادر على التفكير المركب هو اللي ينزل لمستوى الحيوان البسيط غير القادر على الطلوع لمستواكم؟

ج- غور يالا من وشي و ماتتفلسفش عليا انت كمان.. ماهي مش ناقصاك.

م- غاير مانا مش أدك.. بس ياريت ماتغالطش وتبقي عارف ان كده واحد صفر ليا يا كبير.

حوار بين قطة ب و انسان ج (6) /سكرة

سكرة هي السكر ذاته و القطة كما ينبغي أن تكون القطة المستأنسة. و هي برضو المتسببة الأولي في قلق ضميري. سكرة بتديني بلا قيد ولا شرط و طالبة مني طلب وحيد مش قادر أو مش راغب في إني أحققهولها.

سكرة قطة جناين اتولدت في أوضة كراكيب مهجورة في جنينة ناس عواجيز و طلعت من مهد الكراكيب لحرية الطبيعة و اللعب و التنطيط و البرطعة في براح الجناين بين البيوت الريفية.. تاكل فراش وسحالي وعصافير بتصطادها بنفسها أو ما يتفضل به أصحاب البيوت على قطط جناينهم. أول مرة شافتني فيها قربت مني بفضول غير مشوب بحذر القطط الغريزي من البشر خصوصاً اللي ميعرفوهمش. وحطيتلها مع عسلية ومشمش وبسبسة شوية لبن يفطروا.

تاني مرة شافتني جات تجري عليا كإننا أصحاب من سنين ومكانتش عايزة مني أكل.. عايزة تحييني وتلعب معايا بس. دلوقتي بعد سنة و أكتر من التعارف عسلية ومشمش مابيسألونيش غير عن الأكل وسكرة ما بتسألنيش غير عن الصحبة واللعب وطلبها اللي معذب ضميري هو طلب القرب مني. عايزاني أعملها قطتي وأدخلها البيت. كتير بتخربشلي علي البيبان والشبابيك و تنوح بنونوة تقطع القلب و تقوللي أفتح لو سمحت وانا أقوللها بحزم لأ يا سكرة ماينفعش.. إنتي قطة جناين وواخدة على الحرية و عيشة الشقق مش هتنفعك ولا تعجبك.. ممكن بعد كده تغيب يومين تلاتة وممكن برضه في الصباح ألقاها مستنية قدام الباب.

س- نو

ج- ياصباح البونجورنو يا سكر

س- يا نايم الليل وانا صاحية.. صباح الفل علي عيونك

ج- أيه يا بت الغزل الصريح ده.. خلي عندك شوية خشى

س- الحبيب تفضحه عيونه

ج- طاب أفطر الأول يا جميل وبعدين نشوف المواضيع دي

س- لو مكنتش تحلف.. هات يا سيدي الفطار

 تشرب شفطتين لبن و تسيب باقي القطط منهمكين في لعق الحليب و تناديني

س- أنا فطرت خلاص..تعال بقي نلعب ونتكلم من غير ما يخدوا بالهم و ييجوا ورانا

ج- النهارده مش هينفع نلعب.. عندي شغل كتير

س- كل يوم عندك شغل كتير.. علي العموم انا هافضل جمبك وانتا بتشتغل ومش هاضايقك و لو حبيت أساعدك مش هتأخر عنك

 لو بعزق حفرة بالفاس أحط فيها زرعة جديدة بتيجي جمبي و تحاول توسع معايا الحفرة بضوافرها.. لو بحوش حشيش شيطاني طالع وسط الزرع تخربش في أقرب حاجة خضرا تشوفها و ممكن يكون الزرع الجديد اللي لسه مشتول.

ج- ابعدي يا عبيطة هتعوري نفسك وبتبوظي الشغل

س- مقبولة منك مع إني مش متأكدة مين العبيط فينا .. اللي يحوش حشيش يموته عشان يحط حشيش غيره و يحافظ عليه ولا اللي بيعامل كل الحشيش نفس المعاملة ؟

ج- فيه نوعين من الزرع يا سكر .. حشائش ضارة دي اللي بنموتها وخضراوات مفيدة دي اللي بنزرعها و نحافظ عليها

س- ولا فيه أي فرق و كلهم نفس الطعم الماسخ لكن براحتك و مش هاضايقك زي ما وعدتك وهمدد تحت شجرة الرمان لغاية ما تخلص شغل وإذا حبيت بعدها نتكلم ونلعب شوية هتلاقيني

بعد الشغل

ج- عامل أيه يا جميل ؟

س- مش ولابد..بس ماشية يعني

ج- حالك مش عاجبني.. أكلك ضعيف وفقدتي شغفك باللعب والانطلاق

س- اللي مشغوفة ومشغولة بيه مش مهتم بيا

ج- بصي يا بنت القطط.. اللي انتي طالباه مني مش في مصلحتك ومش هقدر أنفذهولك

س- مش شايفاها حاجة صعب إنك تعملني قطة بيت بدل مانا قطة جنينة لكن براحتك و راضية بشوية الطبطبة القليلين لما يجيلك المزاج

ج- انا ملاحظ إن مشمش بيحاول يتقربلك وانتي بتصديه مع إنه شاب ممتاز و كل القطط تتمناه

س- شخصيته ضعيفة ومش مالية عيني

ج- تكون شخصية حنكورة البلطجي القوية هي اللي مالية عينك؟

س- أكتر قط كرهته في حياتي

ج- لولا إني عارف إن القطط بتخلص مشاكلها مع بعض بنفسها من غير تدخل طرف تالت كنت ضربتهولك.. بس كمان أخاف عليكي يأذيكي وانا مش موجود .. هل هو ده السبب في إنك عايزة تغيري قدرك و تبقي قطة بيت؟

س- مفيش قطة بتتمرد علي قدرها.. لكن بنحاول نحسن شروط وجودنا بكل الطرق حتي الملتوية والعنيفة وانا شبعت عنف فمش طالبة منك غير تزويد جرعة الحنان والطبطبة.

لمراسلة المجلة بمواد للنشر في صورة ملف word عبر هذا الايميل:
salontafker@gmail.com

اشترك في صفحة تفكير الثقافية لتصلك مقالات تفكير اضغط هنا

تابعنا عبر صفحاتنا على وسائل التواصل الاجتماعي:

• جمال عمر
• قناة تفكير
• إذاعة تفكير
• صفحة تفكير الثقافية
• صالون تفكير