بقلم: إيمان إسماعيل

بيقولوا “لكل واحد نصيب من اسمه” لكن أنا مؤمنة إن صاحب إختيار الاسم بياخد النصيب الأكبر، كل واحد بتجيله الفرصة يسمي بيكون غالباُ بيدور على حتة من نفسه وعنده أمل يلاقيها في صاحب الاسم، يمكن ده أول احساس حسيته لما قريت إن سيد درويش إختار لحبيبته اسم “حياة” ومع إنه سماها حياة صبري لكن أنا قريته “حياة سيد درويش

إتولدت عائشة عبدالعال في الاسكندرية ومحدش عارف تاريخ ميلادها بالظبط، بس بيقولوا إنها مواليد 1895، مش مهم قوي تاريخ ميلادها عشان وهي عندها 14 سنة اتكتب لها ميلاد جديد، هربت من أهلها لاجل المغنى وانضمت للفرق الغنائية، وفي يوم من أيام سنة 1918 وهي بتغني مع فرقة عكاشة شافها سيد درويش ومن هنا بدأت الحكاية واتحولت عيشة لحياة، نقدر نقول اتولدت حياة صبري على إيدين درويش المفتون بحبها

بيقولوا اتجوزها عرفي وبيقولوا متجوزوش، مش مهم، المهم إن درويش كان غرفان في عشق حياة وبقت هي شريكته في أغانيه، غنت معاه أجمل وأهم أغانيه زي أغنية “على قد الليل ما يطول” الأغنية بديعة بلحن لما تسمعه تحس إنه لحن من الجنة، وكلمات فيها حلاوة وشقاوة ومحبة، بتقول كلماتها:

يقول درويش: على قد الليل ما يطول مسترضي بسهري ونوحي

في حبك ياللي من أول ماشوفك تترد روحي

طول ما أنا وانتي في الدنيا دي أهلى وأجدادي

وأروح على فين وإنتي قصادي

فترد حياة: آه يا ترى يا ربي هو ولا لأ… حبوبي

درويش: يا عين الحبوب من جوه … يا سبب وعدي ومكتوبي

يا كتاكيتها

حياة: يا ننوسو

درويش: يا قطاقيطها

حياة: يا حنتوسو

درويش: ده أنا من النجمة في إنتظارك

حياة: أديني نازلة

ويكملوا الدويتو الشقي المعجون بخفتهم وجمالهم وحبهم لبعض واللي مكانش الوحيد، لكن درويش أغاني كتير لحياة غنتها منفردة وغنت كتير من أغانيه على مسارح شارع عماد الدين، ووقفت قدامه بطلة الاوبرتات اللي عملها من خلال فرقته، اشتهرت حياة وهي إيدها في إيد سيد درويش، حبيبها وأستاذها اللي علمها أصول الصنعة واللي كانت تقف بكل فخر وتقول ” أنا حياة تلميذة وملهمة سيد درويش

درويش مكتفاش بإن حياة تغني معاه في المسارح، وقرر إن حياة تبقى شريكة صوتها مع صوته على الاسطوانات، مكانش ده سهل ساعتها، كان وقتها موجود تلت شركات بس وبتسجل للمطربين المشهورين اللي اسماءهم ملعلعة في عماد الدين المسارح الكبيرة في البلد، الشركات دي هي”أديون وبيضافون وميشيان” لما سيد درويش عرض عليهم اسم حياة تبقى شريكته في تسجيل أغانيه كلهم رفضوا

درويش مستسلمش ونقدر نقول خاض حرب عشان حبيبته، رفض يسجل مع منيرة المهدية ونعيمة المصري وغيرهم من المطربات الأكتر شهرة من حياة وقتها، وقدام درويش واسمه وادراك الشركات لأهميته وافقوا

وطلعت مجموعة أغاني متسجلة بصوت الثنائي، منهم أغنية على قد الليل ما يطول، ويا ورد على فل وياسمين، وام اسماعيل، وده بأف مين، والله تستاهل يا قلبي، مين زيي، وغيرها أغاني كتير، والحقيقة درويش كان عنده حق يصر على اختيار حياة، ماهو مكانتش الأغاني هتطلع بالروح دي غير معاها، مكانش هيعرف ينسجم ويغني من قلبه كده غير مع حياة

نجم حياة بقى في السما، وكانت عايشه حالة ولا في الأحلام، بقت مغنية وممثلة مشهورة وكمان عايشة قصة حب ولا حواديت ألف ليلة وليلة، بس القدر كان له رأي تاني، وقرر يقلب حياتها فوقاني تحتاني، في ليلة ومن غير سابق إنذار مات درويش واللي موته كان وما زال لغز، مات درويش يوم 15 سبتمبر سنة 1923

حياة معرفتش تكمل وصدمتها في موت أستاذها وحبيبها كانت أكبر من إنها تتجاوزها، واعتزلت الحياة الفنية، وخفت نجمها،وعلى ما فاقت من صدمة موت درويش كانت بدأت تتنسي واسمها يختفي من الساحة، اشتغلت شوية مع فرقة أمين عطالله وفي سنة 1925 اشتغلت في كازينو مونت كارلو مع فرقة فوزي منيب، وفي سنة 1928 اشتغلت في صالة الأوبرا في الاسكندرية وفضلت تعافر لحد سنة 1932 لحد ما قدرت تكون فرقة باسمها

فرقة حياة صبري وشريكها عبداللطيف جمجوم اشتغلت في كازينو ليلاس وعملت شوية مسرحيات منها “أنا وأنت” اللي ألفها نجيب الريحاني وبديع خيري، لكن للأسف الفرقة محققتش نجاح كبير وبعد فترة قصيرة الفرقة عملت حياة محاولة تانية بس المرة دي فرقة غنائية وبرده الفرقة منجحتش ورجعت حياة تتنقل بين الفرق المختلفة وهي بتدور على فرصة للنجاة والاستمرار

استسلمت حياة في النهاية واعتزلت الفن واتجوزت عمدة اسمه جميل إبراهيم وخلفت منه إبنها الوحيد محمد، محمد كان طيار في الجيش المصري واستشهد سنة 1954، حياة مستحملتش صدمة موت ابنها واعتزلت الحياة تماما وراحت عاشت في مقابر الإمام الشافعي جنب قبر ابنها، ومكانش حد بيزورها ويودها غير الفنانة نجمة إبراهيم، ماتت حياة سنة 1962 وكل اللي حواليها ميعرفوش عنها غير إنها الست أم جميل وبس

• YouTube
• YouTube
• Telegram
• Facebook

لمراسلة المجلة بمواد للنشر في صورة ملف word عبر هذا الايميل

salontafker@gmail.com