العشق الإلهى
كتبت سلوى محمد
نقول بسم الله… انا لبست الحجاب في اعدادي اجباري لان المد الوهابي كان منتشر جدا وبدأت المدارس كلها تفرض الحجاب … وقتها مكانش الموضوع بالنسبالي فارق لاني كنت من الطلبة الدحيحه والاولي دايما فكانت اهتماماتي بالدراسة اعلي جدا بس في نفس الوقت كانت علاقتي بربنا في مرحلة الرومانسيه والعشق كنت ومازلت في ديالوج مستمر مع ربنا بس وقتها كان بيغلب عليه الحب الخالص لدرجة اني وقت الغروب واحيانا الشروق كنت بقعد متنحه للسما اكلم ربنا والشجر والعصافير…الخ
في كل حاجه واي حاجه بحب خالص لغاية اجازة تانيه اعدادي، لما وقع تحت ايدي سلسلة مجلدات ضخمه جدا بتحكي تاريخ الاخوان، اظن كانت بتاعة الهضيبي، كانت عند جدي اللي حكيت انه ازهري واعتقد انه كان علي علاقه وثيقه بيهم…
المهم اتأثرت جدا بالكتب دي، وكان نتيجة دا اني دخلت في مرحلة تدين اختياري محب ونقلت التأثير دا لاصحابي، وعملنا شلة لدراسة وتدارس وحفظ القران، وبعد ما كنت بننزل مشردين بالشباشب واي حاجه نلعب بقينا ننزل بحجاب كامل ومصاحف ونصلي وقتي وجماعه … المهم مع دخول ثانوي الدراسة طغت علي اهتماماتي، بس كمان بدأت افكاري تختلف، وبدأت احس بالغضب تجاه حاجات مكنتش قابلاها في السيرة أو حتي في القرآن …نيجي بقي للحجاب فضلت بيه لغاية اولي جامعة، وفي اول تانيه رحت قلعته في عز تحكم الجماعات في الجامعه في الصعيد وطبعا مكنش في غيري في الدفعه بشعري… وقتها انضميت لنادي الفكر الناصري والحزب الناصري وكان لينا شله الحمدلله تعتبر عزوة من سخافات الاخرين، وكانت لنا صولات وندوات وفعاليات، ومنها مواجهتي مع احمد عمر هاشم في ندوة في الجامعة، ورده السخيف عليا لما تبقي ترتدي الحجاب ابقي تعالي كلميني، وتصفيق حاد من الجمهور لرده المبهر عليا…
خلصت بقي الجامعه وجه اول يوم تكليف ليا في قرية، اخترت وقتها اني البس ايشارب صغير توافقا مع المجتمع، ومرت الايام بقى واتجوزت وخلفت وسافرت وبسبب ظروف في حياتي مكانش موضوع الحجاب بيمثل ليا صراع اكون او لا اكون، جايز لان جوزي مديني الحرية في القرار دا وجايز لظروف السفر او الكسل او الانشغال بس الشئ الثابت كان ان صورتي الذهنيه عن نفسي اني مش محجبة، واني دا فقط عرف اجتماعي مش اكتر ولا اقل وحتي الان لسه بلبس الحجاب وبخلعه، ومش شايفه ما يدعوني لاني البسه او اخلعه تماما ودا مش شاغل تفكيري ولا عاملي أزمة.
لمراسلة المجلة بمواد للنشر في صورة ملف word عبر هذا الايميل
salontafker@gmail.com
تابع قناة جمال عمر علي يوتيوب شاهد قناة تفكير علي يوتيوب تابع تسجيلات تفكير الصوتية علي تليجرام انضم لصالون تفكير علي فيسبوك
شارك المحتوى
اكتشاف المزيد من تفكير
اشترك للحصول على أحدث التدوينات المرسلة إلى بريدك الإلكتروني.
اترك رد