كتب مراسلنا في المنصورة أحمد شحاتة

اليوم الحلو مع الناس الحلوة جدا، من ندوة صالون تفكير المنصورة يوم الجمعة 11 من شهر يوليو، مع الرائع د. وليد الخشاب عن الكوميديا بالسينما المصرية.
د. وليد هو أستاذ الدراسات العربية في جامعة يورك في تورونتو ومدير مركز البحوث العربية في كندا، و له عدة أبحاث عن الفن والسينما وعلاقتهم بالمجتمع، وله كتاب “مهندس البهجة” عن الفنان فؤاد المهندس، وشارك كمان في وثائقي عن المهندس على قناة الوثائقية المصرية.
كتابه الأخير “قهقهة فوق النيل” وهو دراسة لبعض الأفلام الكوميدية وعلاقتها بالمجتمع أيضا في مرحلة ما قبل التحرر الوطني وما بعده تفاعل الفن مع الواقع الاجتماعي السياسي وقتها، وتمصير بعض الافلام الاجنبية المقتبسة لتناسب الواقع المصري ..


كنت متحمس للندوة جدا لانها تخص موضوع يخص حاجات بهتم بيها جدا وعندي شغف كبير ناحيتها غير شخص د وليد طبعا، وكده كده حلاوة لقاء ناس تفكير المنصورة اللى فعلا قادرين يعطوا الواحد طاقة إيجابية ومشاعر حب لا توصف، د وليد غني عن التعريف طبعا.
وأنا بشوف دراسة السينما مع ربطها بالواقع شئ مهم جدا بالذات فى مرحلة ما قبل التحرر الوطني اللى ممكن نأرخها بثورة 1919، وفى مرحلة ما بعد التحرر من بعد سنة 52 بكل التغيرات السياسية والاقتصادية والاجتماعية اللى حصلت ، فاحنا محتاجين النوع ده من الدراسات لفهم كتير من تاريخنا الثقافي والفني والاجتماعي.


بالنسبة لسؤال الضحك هل حرام أو حلال؟ فالضحك هو فعل اجتماعي صعب نحصره في السؤال ده واللي بيحمل ثنائية فكرية عقيمة مردها لطبيعة الفكر هنا وكأن مفيش مناطق رمادية منقدرش نحط حاجة في قالب أو اتنين فقط
.

وطبعا د وليد استفاض في عرض الجزئية دى بالندوة ، أما تاريخيا الضحك والسخرية كانت متنفس لكتير من أزمات البلد، بداية من النقوش والرسومات الكاريكاتيرية بمصر القديمة زى نقوش دير المدينة بالأقصر، أو حتي سخرية بعض المحامين المصريين من القضاة الرومان لدرجة أجبرت الأخيرين على طرد بعضهم.
غير منامات ابن دانيال فى عصر المماليك وفن خيال الظل وكتب زى الفاشوش فى حكم قراقوش لحد حديثا كتابات أحمد رجب وجلال عامر الساخرة وأفلام المخرج محمد أمين وغيرها من النماذج ..


فتخيل عدم وجود كل الحاجات دى أو عدم وجود الضحك في حياتنا ؟! كنا ها نروح العباسية من بدرى فالضحك هو متنفس للجميع وهو دراسة جادة كما كتب وقال د. وليد ، فهو مش حاجة لا قيمة لها كما يتوهم البعض أو بتدي وقار للبني آدم بالمطلق كده.
أما عن فكرة الاقتباس من الأعمال الأجنبية فهي مكنتش مفاجأة ليا لاني كنت عارف بخصوصها ورغم ذلك بحب اتفرج على النسخ المصرية من الأعمال دى،

الاقتباس بحد ذاته مش عيب طالما انا وثقت اقتباسي ده وعالجت الموضوع بشكل مختلف مش منحوت نحت.
مثال مسرحية كارمن لمحمد صبحي انا عارف أصلها لكني بحب اتفرج ع النسخة المصرية منها وكذلك مسرحية سيدتي الجميلة أو غيرها من الأعمال طالما الروح المصرية فيها وصناع العمل أقروا أنهم اقتبسوها من كذا وكذا، حتى بمجال بحثي الأكاديمي الاقتباس شئ موجود لكن بشروط ونسبة معينة غير طبعا نوثق الاقتباس ده في الهوامش وننسب احنا جيبنا الكلام ده منين ومصدره فين بالظبط ضمانا لحقه.
ختاما احنا كنا فى ندوة محترمة وشيقة ومختلفة جدا
تجمع بين الفن والأدب والتاريخ والسينما 
ومن قبلها الصبح تمتعنا بأكل جميل من وزير التموين محمد بيه رفعت
واشكر كل القائمين عليها وكل اللى حضروا.

لمشاهدة ندوات د. وليد الخشاب في صالون وأكاديمية تفكير اضغط هنا

لمراسلة المجلة بمواد للنشر في صورة ملف word عبر هذا الايميل:
salontafker@gmail.com

تابعنا عبر صفحاتنا على وسائل التواصل الاجتماعي:

• جمال عمر
• قناة تفكير
• إذاعة تفكير
• صفحة تفكير الثقافية
• صالون تفكير