حين تصالح النوم

لمّا الرِّجل تُعاق عن حركة
لمّا في عُمر تقل البركة
لمّا الحب يكون أوهام
لمّا في يوم تنسى الأحلام
لمّا تنام وتفوق مخنوق..
ارفع راسك.. بص لفوق!

افتح قلبك بس لربك
اطلب ومتبقاش مكسوف
وانسى الخوف
انسى آثامك..
ارجع احلم حلم جميل
احلم يوم ترجع أيامك
يوم ما تودع فيها غرامك

حب الدنيا غرام كداب
ابعد فورًا وأقفل باب
باب الزيف
كان في حياتك اتقل ضيف
باب الضحكة الصفرا الهامدة
باب الفكرة الصح الخامدة

صحصح يلا وفَوَّق عقلك
واوعى تسيب القلب ده سايب
واوعى تصدق لو قال دايب
سايق بيك لطريق مسدود
شدك، خطفك، عدى حدود!
قوله خلاص المنصب راح
ارجع اهدأ ويلا ارتاح

خليك في مكانك حساس
حِس بنفسك قبل الناس
خليك قلب جميل وكيوت
وسيب العقل يسوق الدفة
وانت ارتاح من تعب السكة
خلي عينيا تصالح النوم
وانت كفاية تشيل في هموم