الإيضاح والبيان للرد على عمرو بن عبد الرحمن… بقلم: محمود عماد
هذا المقال هو تعليق على تعليق الصديق السكندري عمرو عبدالرحمن على ندوتي: هو نصر أبو زيد عاوز يقول إيه؟ هل نصر أبو زيد باحث أكاديمي أم مناضل سياسي، وقد نشر تعليقه في مقال بعنوان ابتغاء الرشاد في الرد على محمود بن عماد
محمود عماد
ملحوظة مهمة قبل ما تقرا، أنا في كذا نقطة متفق فيهم مع عمرو علشان كدا مذكرتهومش أصلاً في مقالي، لذلك أي حاجة كتبها عمرو وأنا معلقتش عليها هنا معناها إني موافق على كل حرف فيها.
مبدئياً كدا وعلى بلاطة
أنا مقولتش خالص إنه نصر مناضل سياسي مش باحث أكاديمي.
أنا قولت في الندوة وهي متسجلة بالمناسبة وتقدر تتفرج عليها من هنا
إنه مش بس مجرد باحث أكاديمي شاطر. لا دا كمان مناضل سياسي!
تاني لأصحاب الرياضيات وبما إن عمرو مهندس وممكن يكون بيفضل لغة المعادلات الرياضية
نصر= باحث أكاديمي متميز جداً + مناضل ثوري اجتماعي سياسي🤝
ونص كلامي في الندوة كان
” نصر كان مناضل سياسي من الدرجه الأولى لكن مش بمعنى الانتماء لحزب معين أو طمع في الوصول للسلطة؛ لكن كان مناضل سياسي بمعنى إنه بيدافع عن الفقراء والمهمشين، وقضيته هي قضيه العدالة الاجتماعية وحرية الفكر والرأي، وعمل ده في كل كتبه ومشاريعه الفكرية وفي ندواته وفي تدريسه لطلبته من كل دول العالم، وتوعيتهم عن الإسلام اللي بيعلم المسلم إزاي يدافع عن الحق وما يستسلمش للاستبداد سواء من السلطة أو من الدين. “
يمكن أكون نسيت أكد على إنه باحث أكاديمي رفيع المستوى عاش مخلص لأبحاثه ولطلبته ولم يتوقف لحظة عن الكتابة والانتاج الفكري وظل ينقد نفسه ويرتقي بمستواه العلمي لحد ما بقى نجم من نجوم البحث العلمي في مجال الدراسات القرآنية في الأكاديميا العربية والغربية ويمكن أنا شوفت الاحتفاء في أبحاث البروفيسير أنجيليكا نويفرث الاسم الأبرز في ال50 سنة اللي فاتت وهي بتحيل كتير من أبحاثها على كلام نصر أبو زيد، ف نصر كباحث وصل للقمة في حقل الدراسات القرآنية مفيش شك.
انهيار الأفكار
أولا: فكرة تحليل الخطاب
أنا درست كل كلمة وكل حرف في كلام نصر عن القرآن باعتباره وحدات خطابية وليس نص موحد له مركز دلالة
وماذا كانت نتيجة ذلك 🤷؟
ولا حاجة 🙋
بنرجع نفسر الآيات نفس التفسير تاني عادي 🤚😁
يبقى هو نص وخطاب من الأول وكفانا تقعيدات نظرية ملهاش نتاج تطبيقي.
ونظرية تحليل الخطاب بشكل عام كويسة وكل حاجة وممكن نستفيد منها في تطبيقها على التراث وغير التراث معنديش مشكلة خالص لكن كلامي هنا عن استخدام النظرية في تفسير القرآن.
ثانياً: نفيه لوجود الجن والحسد والشياطين
والله يا عمرو أنا كان نفسي يطلع زي ما أنت بتقول بالظبط بس
نص كلامه في كتاب نقد الخطاب الديني فهمت منه إنه مش متقبل فكرة وجودهم لأنه شايفهم خرافة مأثرة على تطور العقل العربي بالسلب
وعلشان الموضوع كبر واضطريت أرد عليك في مقال مش في بوست فقولت جايز أنا فهمت غلط ورجعت أبص على تحليل طارق حجي النقدي
في مقال (نصر أبو زيد وطبيعة القول القرآني، ثانيًا: تأسيس مقولة التاريخية، موقع تفسير) ولاقيته ذكر نفس الموضوع في كتاب نقد الخطاب الديني ص222 وبيعلق عليه وبيقول:
” فيرى نصر أنَّ ذكر القرآن للجنِّ والشياطين، لا يعني إقرار القرآن بوجودها، فذكرُ القرآن لهذه «الكائنات الأرواحية» التي تُمثِّل جزءًا من تصوّرات الجاهليين الأنطولوجية واللغوية كما أوضحنا، تمّ عبر تحويرات دلالية «تحجيم القدرة والأنسنة» تهدف في النهاية إلى التخلّص من التصوّرات الأسطورية؛ بتعبيره: تهدفُ إلى (نقل الثقافة من مرحلة الأسطورة لبوابات العقل)، (فنقل الثقافة من مرحلة الأسطورة) يصبح هو مغزى النصّ المُحدِّد لمقصد الوحي واتجاهه أي «العقلانية»، «العقلانية» -بهذا المعنى المُحدَّد كمضاد للأسطورة كخرافة-، هي مقصد النصّ الذي يُعطيه الحضور أمام التصوّرات الجاهلية، بحيث يعمل على تحوير هذه التصورات لا مُضادتها مباشرة، ليَدَعَ للقراءة التحريكية للنصِّ المُتوسِّلة بالتسييق التاريخي كأداة رئيسة مهمّة كشفَ «المغزى» من وراء هذه التحويرات وكشف اتجاهها و«مقصدها» نحو نزع الخرافة.“
وطبعاً تلميذ نصر جمال عمر شرح الموضوع دا في أكتر من لقاء مسجل على قناته وعلى قناة تفكير
ف هي باين انها غلطة منه
وأنا حسيت بكدا لأنه في حواراته المصوره متكلمش عن الحكاية دي 🤚ف بنسبة كبيرة تراجع عن فكرة الجزم اللي كان متبنيها وبقى زي ما أنت شرحت كدا عن تصوره الجديد المذكور في كتاب الخطاب والتأويل
وبمناسبة الكتاب دا أحب جداً أرشحه لأي حد عاوز يبتدي يقرا لنصر أبو زيد إنه يبدأ من الكتاب دا
اخر حاجة أحب أقول إن كلنا اتفرضت علينا ثورة يناير محدش فينا كان بيسعى إنه يكون ثوري ولا حاجة 🙋ولا مناضل ولا حاجة، لكن المهم لما جت لحظة بتختار فيها بين الزيف وبين الحقيقة، وتقوم تختار الحقيقة فتكون مناضل.
وأنا أحسبك يا عمرو أنت كمان مناضل حتى لو مكنتش بتروح للمعارك برجليك ويكون جرجرك ليها جمال عمر بطيبته الشريرة المعهودة.
وزي ما رشحتلي ندوة لنصر أنا كمان أرشحلك تتفرج على لقاء نصر مع محمود سعد في قناة التلفزيون الرسمي وهو بينقد الوضع السياسي المصري في مصر قبل ثورة يناير.
لمشاهدة تسجيل صوتي لمحاضرة محمود عماد علي راديو تفكير على تليجرام اضغط هنا
لمشاهدة تسجيل فيديو للندوة الرابط التالي
لمراسلة المجلة بمواد للنشر في صورة ملف word عبر هذا الايميل:
salontafker@gmail.com
اشترك في صفحة تفكير الثقافية لتصلك مقالات تفكير اضغط هنا
تابعنا عبر صفحاتنا على وسائل التواصل الاجتماعي:
تابع قناة جمال عمر علي يوتيوب شاهد قناة تفكير علي يوتيوب تابع تسجيلات تفكير الصوتية علي تليجرام انضم لصالون تفكير علي فيسبوك
شارك المحتوى
اكتشاف المزيد من تفكير
اشترك للحصول على أحدث التدوينات المرسلة إلى بريدك الإلكتروني.
اترك رد