تنشر “تفكير” سلسلة د. أكمل صفوت عن ثورة العبيد في هايتي، في تسع حلقات، تُنشر حلقة جديدة أسبوعيًا.
السلسلة مستوحاة من بودكاست The Age of Napoleon، وتقدم قراءة مبسطة لأحداث الثورة وخلفياتها ودلالاتها التاريخية.

بقلم: أكمل صفوت

طبيب استشاري علاج الأورام بمستشفى جامعة أرهوس بالدانمرك، ومن المهتمين بالفكر الديني والإسلام السياسي وهموم المصريين في المهجر.

حرب السكاكين

ريجو كان أهم جنرال من السمر في الجيش. ماكانش له خبرة عسكرية قبل الثورة لكن أثبت مهارات قيادية لما المعارك بدأت. زي توسان، غيّر ريجو من ولاءاته أثناء سنين الثورة لحد ما استقر في جانب فرنسا. ريجو كان موقعه في الجنوب اللي فيه أكبر عدد من السكان السمر. 

ريجو وزمايله كانوا معترضين على طريقة إدارة توسان للبلد وشايفين إنهم بيتم استبعادهم من صنع القرار السياسي. طبعا كان فيه دوافع عنصرية ورا عدم الرضا السياسي وشك حوالين سياسة توسان إنه يشجع المزارعين البيض اللي سابوا هايتي انهم يرجعوا للبلاد. 

دبر جنرال ريجو تمرد مسلح واسع في يونيو 1799. احتل المتمردين مواقع استراتيجية وبدأوا في قتل الموالين لتوسان. رد الجيش على الهجوم ودخلت هايتي مرة ثانية في عنف وحشي. كفاية نعرف ان الفترة دي اتسمت في تاريخ هايتي بحرب السكاكين علشان نستنتج حجم الدم والبشاعة. 

في النهاية فشل تمرد ريجو وتم قمع جميع الانتفاضات المؤيدة ليه وفي يوليو 1800، قدر توسان فتح الباب يستولى على آخر معاقل ريجو. انتهت حرب السكاكين، لكن الضرر الذي سابته وراها كان مهول. مات عشرات الآلاف من الهايتيين أو نزحوا في بلد مزقته الحرب بالفعل.

مع النسور 

واحد من آثار تمرد ريجو ان توسان حس بفشله الشخصي إنه يتنبأ بالتمرد أو يمنعه. الموضوع ده أثر عليه جدا وبقى كبير الشك في اللي حواليه، شديد السرية وأكثر سلطوية. لكنه مع ذلك ماكانش عنده شك فى إيه هي الخطوة الجاية لهايتي بعد سنين طويلة من الاقتتال الأهلي والحرب ضد قوتين عظمتين (إسبانيا وإنجلترا). 

في الوقت ده توسان فتح الباب كتب:

“لقد حلقت مع النسور، ويجب أن أكون حكيماً في العودة إلى الأرض، لا أستطيع الهبوط إلا على صخرة، وهذه الصخرة يجب أن تكون صرح الدستور”.

توسان كان عايز لهايتي دستور جديد يؤكد المكاسب السياسية ويديها استدامة ويخلق استقرار ضروري للنمو الاقتصادي.

كمستعمرة فرنسية فأي حاجة من النوع ده كان لازم تتعمل بالتنسيق مع فرنسا. وفي الوقت ده ومع نهاية حرب السكاكين جابت السفن اللي جاية من فرنسا أخبار جديدة ومهمة، انقلاب جديد في فرنسا وحكومة جديدة بفكر جديد، ورئيس جديد اسمه… نابوليون بونابارت. 

دستور يا أسيادنا 

من أوائل الحاجات اللي عملها بونابارت إنه إدى حق للمستعمرات الفرنسية يبقى لها قوانينها الخاصة. قبل كده كانت حكومات الثورة المتعاقبة ليها موقف ايديولوجي وكانت فلسفتها انها بتتبنى قوانين بقواعد إنسانية عامة تنطبق على الكل. من مزايا ده كان قرار تعميم إلغاء العبودية في المستعمرات، لكن طبعا في أحوال تانية كان فيه مشاكل ان باريس تحط قواعد تسري على بلاد بعيدة ومختلفة اجتماعيا وثقافيا، فالموضوع يعني معقد شوية. ممكن يبقى له جوانب إيجابية أو جوانب سلبية بحسب الظروف. الخوف كان أن قرار زي ده يفتح باب التخلي عن المبادئ الإنسانية بحجة “الخصوصية الثقافية” وده باب ممكن يدخل منه شياطين كتير. 

بونابارت كمان بعت لجنة من ٣ أشخاص لهايتي علشان تدرس حالة البلاد وتبعت تقريرها لفرنسا وتقر وضع الحكومة الجديدة واختار على رأسها مثقف من السمر اسمه جوليان رايموند. جوليان وتوسان كان فيه اتفاق فكري بينهم فاختاروا سوا لجنة لكتابة الدستور من عشرة أشخاص. 

أعضاء اللجنة كانوا بشكل عام من الداعمين لتوسان وده كان نتيجته أن بعض بنود الدستور كانت بتدعم الشكل السلطوي اللي توسان كان بدأ يدير به الأوضاع في هايتي. 

منها مثلا ان توسان حيكون حاكم مدى الحياة وله الحق في تسمية خليفته. حيكون فيه هيئة تشريعية، والتجارة والسياسات الخارجية حتدار من باريس، لكن الدستور تضمن طرق يقدر الحاكم عن طريقها يتجاوز البرلمان أو باريس لو شاف ده ضروري. وطبعا الدستور حظر العبودية والتمييز العنصري بلغة واضحة لا لبس فيها.

الوضع الاقتصادي الصعب اضطر توسان يقلل من حقوق عمال المزارع أو يقيدها فبقى التنقل أو تغيير الوظائف محتاج تصريح رسمي وبقى فيه قوانين ضد “البطالة” وده كان معناه عمليًا إن الجيش كان بيجمع العاطلين عن العمل ويبعتهم يشتغلوا في المزارع. صحيح ده كان لسه بعيد جدا عن العبودية، لكنه ماكانش بالضبط منارة مشرقة للحرية. علشان كده كان فيه ناس كتير بتسيب المدن ويروحوا يعيشوا في الجبال والغابات زي المطاريد. 

كثير من المستشارين والأصدقاء الفرنسيين طلبوا من توسان يعيد النظر في بعض بنود الدستور الجديد، لكنه مش بس رفض لكن قرر يبدأ فى تطبيقه قبل مايجيله موافقة باريس لأن الوضع في هايتي في تقديره ماكانش يحتمل التأجيل وكتب لبونابارت بيشرح له ليه عمل كده لكن نابوليون ماردش. ولما الصمت طال بدأ توسان يحس بالقلق. 

على السطح الوضع كان يبدو هادئ ومزدهر، الاقتصاد بدأ يتعافى. صادرات السكر زادت ثلاثين ضعف وإنتاج القطن زاد 85 ضعف خلال الفترة نفسها.

لكن تحت السطح لسه الوضع ماكانش مستقر تماما.

في أكتوبر 1800 حصل تمرد جديد كأنه إعادة إنتاج لثورة 1791 قام به المزارعين في مزارع السكر، ضد أصحاب المزارع وحصل قتل وحرق للمحاصيل والمباني.

توسان راح بقوات من الجيش وقضى على التمرد. للأسف العقل المدبر وراء التمرد، كان الجنرال مواسى ابن اخو توسان. رفض توسان أي محسوبية في مواجهة الخيانة والتمرد وبأوامره تم إعدام مواسى. 

طول سنة ١٨٠١ حاول توسان انه ياخد من بونابارت تعليق على مسودة الدستور أو رد على جواباته من غير فايدة وأخيرا في ٢٩ يناير سنة ١٨٠٢ ومن غير سابق إعلان وصل لشواطئ هايتي رد نابوليون على شكل أسطول من ٢١ فرقاطة و ٣٥ سفينة حربية و٢٠ ألف جندي بقيادة جنرال لاكلير جوز أخت نابوليون. 

فرنسا أعلنت الحرب على حكومة توسان وقررت إسقاطه بالقوة. 

إيه اللي وصل الأمور للنقطة دي؟ حانشرح بكرة…

يتبع…

المصدر الرئيسي ومزيد من المعلومات موجودة في بودكاست “عصر نابوليون” “The age of Napoleon”