عبرة الألباب من حياة توسان فتح الباب (٩) بقلم: أكمل صفوت
تنشر “تفكير” سلسلة د. أكمل صفوت عن ثورة العبيد في هايتي، في تسع حلقات، تُنشر حلقة جديدة أسبوعيًا.
السلسلة مستوحاة من بودكاست The Age of Napoleon، وتقدم قراءة مبسطة لأحداث الثورة وخلفياتها ودلالاتها التاريخية.
بقلم: أكمل صفوت
طبيب استشاري علاج الأورام بمستشفى جامعة أرهوس بالدانمرك، ومن المهتمين بالفكر الديني والإسلام السياسي وهموم المصريين في المهجر.

ميك فرانس جريت أجين
سؤال ايه اللي حصل، سأله مؤرخين كتير وله إجابات كثيرة مقترحة منها مثلا غضب باريس من مسودة الدستور، أو من ان توسان بدأ تطبيق الدستور قبل ما يوصله تصديق الحكومة في فرنسا. ممكن يكون سبب الغضب هى التقارير اللي اتكلمت عن إن توسان كان بدأ يحكم بشكل سلطوي وينفرد بقرارات كتير. ممكن كمان يكون تمرد مواسى وصل إحساس لباريس إن الأوضاع مش مستقرة ومحتاجين إدارة جديدة. وأخيرا ممكن يكون وصل فرنسا تقارير أن الأمريكان والإنجليز بيغروا توسان بالانفصال وإنه مارفضش الفكرة. وممكن كل العوامل دي مع بعض.
بس كمان كان فيه عوامل تانية داخل فرنسا نفسها ماتقلش أهمية.
في بداية القرن الثامن عشر، فرنسا كانت إمبراطورية ضخمة ومستعمراتها كانت أكبر من مستعمرات إنجلترا لكن الحكومات الملكية المتتالية قبل الثورة فقدت الكثير منها. كندا راحت لإنجلترا، ولويزيانا (ودي وقتها كانت تشمل وسط وجنوب أمريكا) راحت لإسبانيا. أثناء نفس الفترة، فرنسا خرجت من الهند وفقدت أكثر من نص مستعمراتها في الكاريبي. وبكدة تراجع موقع فرنسا وسط القوى العظمى الاستعمارية الأوروبية واللي كانت بتضم بريطانيا وإسبانيا وهولندا والبرتغال.
لما الثورة الفرنسية قامت كان من ضمن طموح الثوار أن فرنسا تستعيد سلطانها فيما وراء البحار.
إحنا عادة بنفكر في مطالب “الثوار” على انها مثالية وعادلة، بس في الحقيقة، في الحالة دي، مطالب العدالة والمساواة كانت موجودة جنب أهداف قومية ماتتحققش إلا على حساب شعوب تانية.
نابوليون ماكانش عنده رؤية ولا سياسة واضحة ناحية المستعمرات بس استعادة ولو جزء من مستعمرات فرنسا كان أكيد واحد من أهدافه. في أكتوبر سنة ١٨٠٠ عقد نابوليون مع إسبانيا معاهدة سانت الدفونسو السرية واللي بموجبها استعادت فرنسا السيطرة على لويزيانا. علشان نابوليون يأمن جبهة الكاريبي دي تماما كان لازم تبقى هايتي مستقرة وتحت السيطرة.
بس ده برضه مايفسرش الغزو العسكري لأن استقرار هايتي والسيطرة عليها كان حاصل بالفعل أو ممكن يحصل بالتعاون مع توسان اللي انضمامه لفرنسا أنقذ هايتي من الضياع واللي لسه قواته هازمة أعداء فرنسا اللدودين إسبانيا وإنجلترا واللي طول الوقت كان بيأكد على وبيتعامل على أساس أنه مواطن فرنسي متبني لقيم الثورة الفرنسية وجزء من حكومتها.
فيه سببين محتملين لاستخدام بونابارت القوة العسكرية:
السبب الأول الأشهر: إن نابوليون كان مستعجل، لأنه كان عارف ان السلام اللي بيستعد يمضي معاهدته مع الإنجليز في مارس ١٨٠٢ (معاهدة ارميان) عمره غالبا قصير. وبالتالي نابوليون ماكانش عنده وقت لتجربة اجتماعية جديدة في هايتي بحاكم أسود اختاره الناس وبدستور بيلغي العبودية وبيحط قواعد للمساواة بيكتبه السود وبيحكموا به نفسهم. نابوليون كان عايز مستعمرة تحت السيطرة وبتطلع فلوس.
أنا شخصيا مش مقتنع قوي بالسبب ده.!
السبب الثاني: إن نابوليون -لدوافع عنصرية- كان واقع تحت سيطرة لوبي المزارعين البيض الكبار في باريس ومصدق تماما في البروباجاندا بتاعتهم.
أنا مقتنع أكتر بالتفسير ده لأكتر من شاهد:
الشاهد الأول: لأن نابوليون أعلن عن موقفه العنصري بنفسه وكفاية لتأكيد ده اننا نقرأ نص لواحدة من خطبه قال فيها:
“أنا مع البيض لأنني أبيض وليس لدي سبب آخر لأن هذا السبب جيد بما فيه الكفاية. كيف أمكننا أن نمنح الحرية للأفارقة؟ لرجال ليس لديهم أي حضارة ولا لديهم أدنى فكرة عما هي المستعمرة أو ما هي فرنسا. إذا كان أعضاء المجلس الموقر وقتها قد فهموا ما كانوا يفعلونه وعرفوا عن المستعمرات مايعرفونه الآن هل كانوا سيلغون العبودية؟ أنا أشك في ذلك كثيرًا”
الشاهد الثاني: أن أوامر نابوليون لقائد حملته كانت إنه يدمر السلطة السياسية للسود بالكامل ويحطم النظام الجديد للمساواة العرقية اللي عمله توسان في السياسة والمجتمع والاقتصاد وينفي أو يقتل أي شخص يقاوم. أي شخص شارك في حكومة توسان، بغض النظر عن لونه، كان لازم يتم ترحيله من المستعمرة. وأي جندي أسود فوق رتبة كابتن يتسرح ويترحل. أو بحسب نص نابوليون لجنرال لاكلير:
“لا تقبل وجود أي رتبة عسكرية واحدة على أكتاف هؤلاء السود”.
يعني باختصار سياسات رجعية تضمن الرجوع إلى النظام القديم للعبودية في كل شيء إلا الاسم.
الشاهد الثالث: أن الحملة من الناحية العسكرية كانت خطأ فادح وصعب اننا نلاقي أي سبب تاني يفسر خطأ بالحجم ده يرتكبه واحد بعبقرية نابوليون العسكرية. ان نابوليون يتوقع أن حملة عسكرية من ٢٠ أو حتى ٥٠ ألف جندي ممكن تهزم -في شهور قليلة- جيش انتصر في معارك دامت ٧ سنين على جبهتين ضد إسبانيا وإنجلترا اللي جيوشهم سوا كانوا أكثر من ٨٠ ألف جندى، مالوش تفسير غير انه كان مقتنع ان جيشه حيحارب مجموعة من الهمج المتخلفين!
عنصرية بونابارت أفسدت حتى عبقريته العسكرية وميلت دفة قراراته لصالح طبقة المزارعين البيض لأنه ماكانش قادر يتصور أن مصلحة فرنسا ممكن تكون بالتحالف مع قائد أسود لحكومة من العبيد السابقين.
بمجرد ما بدأ إنزال القوة الفرنسية أصدر توسان أوامره لجنوده بحرق المدن قبل ما يدخلها الفرنسيين والانسحاب إلى داخل الجزيرة والاستعداد للحرب. مش كل جنرالات الجيش وجنوده سمعوا كلام توسان. بعضهم كانت سنين الحرب أنهكتهم وشاف ان الجيش الفرنسي أقوى من قدرتهم على المقاومة وقرر ينضم للفرنسيين. في النهاية جيش توسان كان حوالي ٦٠٠٠ جندي والفرنسيين أكثر من ٢٠ ألف.
كلاكيت، تاني مرة
المشهد العسكري اتعاد لتاني مرة، واللي حصل للإنجليز من سنين، تقريبا حصل لحملة فرنسا. الفرنسيين قدروا يستولوا على مدن الساحل لكن أي محاولة لهم لاختراق عمق الجزيرة انتهت بالفشل وبخساير كبيرة لدرجة ان بعد ٣ شهور بس ومن قبل أي معارك كبيرة حاسمة خسر لاكلير ربع جنوده وده حتى قبل موسم الحمى الصفرا ما يبدأ. نابوليون بعت لهايتي ١٥ ألف جندى تانيين مع وعد ب١٥ ألف بعدهم. بس لما بدأ موسم الحمى الصفرا كان حوالى ٤٠% من جنود لاكلير إما مرضى أو مصابين.
توسان -كعادته- ورغم كل شيء، ماتوقفش لحظة عن التواصل مع أعدائه وفضل -وسط المعارك الدايرة- يبعت رسايل دبلوماسية عن استعداده للتفاوض. ده كان موقف مبدأي بس كمان مهم هنا اننا ندرك ان الظروف في معسكر توسان برضه كانت قاسية. الأرض قاحلة ومواردها محدودة وكان فيه خطر حقيقي أن الأسلحة والذخيرة تخلص وكان فيه صعوبة انه يقدر يلاقي بديل لهم.
في قهوة عالمفرق
في النهاية المفاوضات نجحت. وفي صيف ١٨٠٢ وصل الطرفين لصيغة وقف إطلاق نار مناسبة، بمقتضاها تم العفو عن توسان (اللي كان لاكلير أصدر أمر بالقبض عليه) وكل رجاله واحتفظوا بوضعهم داخل الجيش في مقابل أن توسان يسيب الحكم ويرجع مواطن عادي. وده بالظبط اللي حصل. الحرب وقفت وجنرال توسان فتح الباب أول حاكم أسود لهايتي الحرة، اللي هزم جيوش ٣ قوى عظمى وفرض إرادته السياسية عليهم، رجع لدكان القهوة بتاعه ولحياته مع أسرته وأولاده.
كان ممكن القصة تخلص هنا…
في الحقيقة القصة كان لازم تخلص هنا. لأن دي اللحظة اللي الكل حصل فيها على اللي هو عايزه.
عبيد هايتي بقوا أحرار، وقائد ثورتهم جنرال في جيش فرنسا، لكنه متقاعد ومابيحكمش ومفيش منه خطر وحكومة فرنسا لسة بتحكم هايتي، اللي حكومتها المفروض بقت نموذج بيجسد قيم وأفكار الثورة الفرنسية.
كانت حاتبقى نهاية سعيدة لكن للأسف مش ده اللي حصل.
مات المناضل المثال
يوم ٧ يونية سنة ١٨٠٢ وصلت رسالة لتوسان من مكتب الحاكم العام بتطلب منه يتدخل لفض نزاع بين المزارعين وأصحاب الأرض في مزرعة قريبة لتجنب أي قلاقل. توسان أخد حصانه وراح. المزرعة ماكانش فيها نزاع ولا قلاقل لكن فرقة جنود قبضت عليه وشحنته على فرنسا في مركب كانت مستعدة للإقلاع. اتسمح لتوسان يسافر مع أسرته وبعض الخدم لكن أول ما وصل فرنسا فصلوه عنهم. تم اعتقاله في قلعة في جبال الألب، واتمنع من أي اتصال مع العالم الخارجي. أخدوا كل متعلقاته الشخصية وبلغوه إنه اترفد من الجيش أخدوا اليونيفورم بتاعه واتنبه على الحراس ينادوه باسمه من غير ألقاب.
توسان طلب تتوجه له تهم محددة ويتحاكم بشكل علني لكن طلبه اترفض. مع دخول الشتا حددوا دخول خشب التدفئة للزنزانة بتاعته للحد الأدنى وده أثر سلبيا على صحته. بدأ في السجن يكتب مذكراته لحد ما منعوا عنه الورق والأقلام. واضح إن كان فيه محاولات مستميتة لإذلال الرجل وإخضاعه لكنه فضل طول الوقت رافض الاعتذار أو الاعتراف بأي ذنب أو جريمة.
في صباح يوم ٧ ابريل سنة ١٨٠٣ دخل الحراس على توسان فتح الباب فلقوه مات. توسان وقتها كان عمره ٥٩ سنة.
الثائر اللي هزم جيوش إسبانيا وإنجلترا وفرنسا واللي ثورته حررت عبيد بلاده واللي ماعرفوش يقبضوا عليه إلا بالخديعة والكذب، مات منفي ووحيد في زنزانة باردة، بس من غير ما ينكسر أو ينحني، في مشهد بيجسد مقولة أحمد فؤاد نجم:
“جسد نضاله بمصرعه ومن سكات،
لا طبالين يفرقعوا ولا إعلانات”
في أوراقه اللي كتبها قبل موته كتب توسان:
“بموتي سيقطع فقط جذع شجرة الحرية السوداء ولكنها بالتأكيد ستنمو من جديد لأن جذورها كثيرة كما هي عميقة”.
الكلاب
بعد وفاة توسان، زمايله في قيادة الثورة انتخبوا أكثرهم راديكالية ودموية “جان جاك ديسيلين” علشان يحل محله كقائد لهم. كقائد عسكري ديسيلين ماكانش أقل براعة من توسان. وفضل يستنزف الفرنسيين بحملات عسكرية صغيرة بس كثيرة ومؤلمة.
مهم هنا اننا نعرف انه قبل وفاة توسان بشهور (يعنى فى صيف ١٨٠٢) قررت السلطات الفرنسية لجزيرة جوادالوبي انها تعيد استخدام نظام العبودية. القرار ده -بحسب القانون الفرنسي- كان غير قانوني، لكن نابوليون بونابارت صدق على القرار .
في بداية سنة ١٨٠٣ نفس الشيء حصل مع مستعمرة جويانا الفرنسية. فبقى واضح للكل إن فرنسا تخلت عن أي أفكار ثورية متعلقة بالعبيد وان الدور جاي على هايتي. وده خلى الصراع بين ديسيلين والسلطة الفرنسية في هايتي، صراع وجود.
جنرال لاكلير جوز أخت نابوليون وحاكم هايتي توفى بالحمى الصفرا في نوفمبر ١٨٠٢ وبعده جه جنرال دي راشمبو اللي واضح انه كان شخصية سيكوباتية سادية مريضة وعنده عداء مرضي ضد السود لدرجة انه استورد من كوبا كلاب مخصوصة لمطاردة السود وكان بيفخر انه ماكانش بيأكلهم غير لحوم البشر الأحياء !!
لما يبقى عندك قائد للجيش بيعمل كده نقدر نتخيل نوع الفظائع اللي الجنود سمحوا لنفسهم يعملوها وهما آمنين من العقاب. المذابح وصلت لدرجة ان فيه جنود في جيش فرنسا سابوا الجيش وهربوا بسبب المجازر اللي كان الجيش بيعملها واللي مش عايزين يبقوا طرف فيها.
لكن ورغم الفظائع والقسوة، كانت فرنسا بتخسر. ولما انتهى السلام اللي كان بين فرنسا وإنجلترا سنة ١٨٠٣، كان إعلان إنجلترا الحرب على فرنسا آخر مسمار في نعش حملة فرنسا على هايتي. لأن إنجلترا قطعت الإمدادات البحرية من فرنسا للحملة وبقت الحملة في هايتي تحت رحمة ديسيلين وجنوده اللي كانوا حيقضوا على آخر جندي فيها لولا ان دي روشامبو عقد معاهدة مع ديسيلين وساب هايتي مع ٥٠٠٠ جندي هم اللي تبقوا من أكثر من ٥٠ ألف راحوا لهايتي من بداية حربها مع توسان. دي روشامبو اتقبض عليه من سفينة عسكرية إنجليزية وهو راجع فرنسا واتسجن في إنجلترا سجن ٥ نجوم لحد سنة ١٨١١ وبعدين رجع فرنسا في صفقة تبادل أسرى. دي روشامبو عمره ما اتحاسب على جرايمه في هايتي ومات متأثر بجروحه في معركة ليبزج سنة ١٨١٣ وهو عنده ٥٨ سنة.
في أول يناير سنة ١٨٠٤ جان جاك ديسيلين أعلن هايتي جمهورية مستقلة عن فرنسا. وبعدها أصدر أمره الشهير بقتل كل البيض في هايتي !!
جان جاك استثنى من قراره القساوسة والأطباء والناس اللي حاربت ضد فرنسا مع السود، واللي متجوزين من سود وغيرهم، لكن سهل نتخيل ايه نوع المجازر اللي حصلت في ظل قرار زي ده.
على نهاية السنة كان جان جاك نصب نفسه “إمبراطور” وفي سنة ١٨٠٦ تم اغتياله. هايتي دخلت بعدها في دوامة من عدم الاستقرار والتدخل الأجنبي من نتايجها إن هايتي ما زالت لحد النهاردة من أفقر بلاد العالم.


نابوليون الأسود
ناس كتير بتوصف توسان بأنه نابوليون الأسود بس أنا رأيي ان ده مش دقيق، صحيح الإثنين كانوا قادة عسكريين وسياسيين وممكن الواحد يلاقي صفات شخصية وطرائف عن الشبه بينهم بس أنا أعتقد إن الفروق بينهم كانت أكبر من التشابهات.
نابوليون كان عسكري بيمارس السياسة وفي ذهنه الحرب الجاية. وكان بيفاوض بخشونة كأنه بيحارب وبيفرض شروطه علشان يخرج من مفاوضاته منتصر وخصمه مهزوم فكل سلام عمله كان مؤقت وغير مستقر. في حين توسان كان سياسي بيحارب وفي ذهنه إمكانية سلام دائم بعد الحرب، فكان بيحارب وهو بيفاوض أو بيفاوض وهو بيحارب وكان بيحارب بمراوغة كأنه بيفاوض ولما يفاوض يخرج الطرفين بمكاسب ومنتصرين.
بس الأهم في رأيي ببساطة أن توسان كان صاحب قضية ثورية حقيقية والسلطة وسيلته لنصرة قضيته فلما شاف ان صالح قضيته في تركه للسلطة سابها، في حين نابوليون كان طامح للسلطة واستخدم الثورة وشعاراتها وسيلة للسلطة ولما وصل لقمة السلطة فضل متشعلق في حبالها الدايبة لحد ما اتقطعت به ووقع.
توسان عمره ما خان أفكاره. في حين تاريخ بونابارت مليان بخيانة الأفكار والحلفاء والمبادئ والتحول من النقيض للنقيض.
تعامل نابوليون مع السود في الكاريبي نموذج للنوع ده من خيانة الأفكار أو ممكن نقول انكشاف ادعاءها. نابوليون المفروض انه بدأ حياته راديكالي على يسار الثورة الفرنسية وكان بيعتبر نفسه التلميذ النجيب للفيلسوف الفرنسي ريانال (اللي كان مهاجم شرس للعبودية)، ولما دخل مالطا فى سنة ١٧٩٨ حرر عبيدها ورجعهم بلادهم (لقطة بروباجاندا تليفزيونية غير مكلفة). لكنه في لحظة فارقة بيملك فيها القرار السياسي والعسكري بيصدق على قوانين بترجع الأحرار عبيد وبياخد قرار خاطئ عسكريا وغير مبرر سياسيا وغير حتمي بغزو هايتي وإسقاط توسان. قرار واضح من سياقاته وما تلاه من إجراءات انتقامية من السود في هايتي بما فيها تسليمه السلطة لناس زي دي روشامبو أن دوافعه عنصرية. خديعة القبض على توسان بعد ما ساب السلطة ونفيه وحبسه ومحاولة إذلاله لحد ما مات فيها بصمة انتقام السيد من العبد اللي تجاوز حدوده.
صعب الواحد بعد كل ده يصدق إن بونابارت كان في يوم من الأيام مقتنع فعلا بمبادئ الثورة الفرنسية وقيمها وأفكارها.
أنا شخصيا لو حاختار شخص يمثل قيم الحرية والعدالة والإخاء والمساواة ونموذج للاستنارة، ومثال ملهم للثوار، فأكيد .. أكيد، حيبقى توسان فتح الباب مش نابوليون بونابارت.
تمت …
المصدر الرئيسي ومزيد من المعلومات موجودة في بودكاست “عصر نابوليون” “The age of Napoleon”
شارك المحتوى
اكتشاف المزيد من تفكير
اشترك للحصول على أحدث التدوينات المرسلة إلى بريدك الإلكتروني.

إرسال التعليق